بلوچستان کے ضلع خضدار کی تحصیل نال میں سکیورٹی فورسز کی جانب سے دہشت گردوں کے خلاف ایک بڑا اور مؤثر آپریشن کیا گیا ہے، جس کے نتیجے میں اب تک کالعدم تنظیم فتنۃ الہندستان کے 14 دہشت گرد ہلاک ہو چکے ہیں۔
سکیورٹی ذرائع کے مطابق مکمل منصوبہ بندی کے تحت کی جانے والی اس کاروائی کے دوران وطن عزیز کا ایک بہادر جوان بھی شجاعت کی مثال قائم کرتے ہوئے جامِ شہادت نوش کر گیا ہے۔
سکیورٹی حکام کے مرتب کردہ اعداد و شمار کے مطابق، فورسز کے شدید دباؤ کے بعد باقی ماندہ دہشت گرد قریبی پہاڑی سلسلوں کی پناہ لینے کے لیے فرار ہو گئے ہیں۔ فرار ہونے والے ان عناصر کے مکمل خاتمے کے لیے زمینی دستوں کے ساتھ ساتھ فضائی کارروائیاں بھی بدستور جاری ہیں، اور دہشت گردوں کے ممکنہ ٹھکانوں پر شدید گولہ باری کی جا رہی ہے۔
اس آپریشن میں فرنٹیئر کانسٹیبلری (ایف سی) بلوچستان اور اسپیشل سروسز گروپ (ایس ایس جی) کے کمانڈوز حصہ لے رہے ہیں، جنہیں گن شپ ہیلی کاپٹروں اور جدید ڈرونز کی صورت میں بھرپور فضائی معاونت حاصل ہے۔
عسکری حکام کا کہنا ہے کہ علاقے کو خطرات سے پاک کرنے اور آخری دہشت گرد کے خاتمے تک تعاقب اور کارروائی کا یہ سلسلہ بلا تعطل جاری رکھا جائے گا۔
