پشاور میں سی ٹی ڈی نے کارروائی کرتے ہوئے دہشت گردی کا بڑا منصوبہ ناکام بنا دیا۔ کارروائی میں داعش خراسان کے 5 دہشت گرد ہلاک ہوگئے۔
سی ٹی ڈی کے مطابق کارروائی ارمڑ کی حدود میں شمشتو کیمپ کے قریب کی گئی۔ ہلاک دہشت گرد اہم تنصیبات اور مذہبی مقامات کو نشانہ بنانے کی منصوبہ بندی کر رہے تھے۔
داعش کمانڈر ہلاک
حکام کے مطابق ہلاک دہشت گردوں میں داعش خراسان کا اہم کمانڈر عمران عرف ابو بکر بھی شامل ہے۔ وہ اسلام آباد سمیت مختلف اضلاع میں دہشت گردی کے 20 مقدمات میں مطلوب تھا۔
سی ٹی ڈی کے مطابق عمران عرف ابو بکر بم دھماکوں، پولیس اہلکاروں اور سیاسی رہنماؤں کی ٹارگٹ کلنگ میں بھی مطلوب تھا۔
اسلحہ اور آئی ای ڈی برآمد
کارروائی کے دوران دہشت گردوں کے قبضے سے بھاری مقدار میں اسلحہ، ہینڈ گرینیڈ اور آئی ای ڈی برآمد کی گئی۔
سی ٹی ڈی کا کہنا ہے کہ بروقت کارروائی سے دہشت گردوں کا منصوبہ کامیاب ہونے سے پہلے ہی ناکام بنا دیا گیا۔ حکام کے مطابق دہشت گردوں کے خلاف انٹیلی جنس بنیادوں پر کارروائیاں جاری رہیں گی۔
دیکھیے: ہنگو میں پولیس چیک پوسٹ پر حملہ ناکام، 4 دہشت گرد ہلاک