پشاور میں قانون نافذ کرنے والے اداروں نے بروقت کارروائی کرتے ہوئے تخریب کاری کا مبینہ منصوبہ ناکام بنا دیا۔ پولیس ذرائع کے مطابق 23 ستمبر کو ایک مشکوک گاڑی تحویل میں لی گئی۔ اس گاڑی میں بھاری مقدار میں غلیلیں چھپائی گئی تھیں، جو پشاور لانگ مارچ لے جائی جا رہی تھیں۔
سیکیورٹی فورسز نے گاڑی کو قبضے میں لے کر ڈرائیور کو گرفتار کر لیا۔ موقع پر برآمد شدہ سارا سامان نذرِ آتش کر کے تلف کر دیا گیا۔ حکام کے مطابق یہ اقدام امن و امان برقرار رکھنے کے لیے فوری طور پر اٹھایا گیا۔
ذرائع کے مطابق سیاسی احتجاج کے بھیس میں مبینہ شدت پسند عناصر سرگرم تھے۔ یہ عناصر نو مئی جیسے پرتشدد واقعات دہرانے کی کوشش میں تھے۔ ایسے آلات عام طور پر فورسز پر حملوں اور سرکاری املاک کو نقصان پہنچانے کے لیے لائے جاتے ہیں۔
حکام کا کہنا ہے کہ پرامن احتجاج کے نام پر جلاؤ گھیراؤ کی اجازت ہرگز نہیں دی جائے گی۔ قانون شکن عناصر کے خلاف سخت قانونی کارروائی عمل میں لائی جائے گی۔ واقعے کی مزید تفتیش جاری ہے۔
دیکھیے: لانگ مارچ سے نمٹنے کا فیصلہ کن منصوبہ: حساس مقامات پر نفری تعینات، ایم ون بند
