وزیراعظم شہباز شریف نے پاکستان سپر لیگ کے گیارہویں ایڈیشن کے فائنل کے لیے تماشائیوں کو اسٹیڈیم آنے کی باقاعدہ منظوری دے دی ہے۔ چیئرمین پی سی بی محسن نقوی کے مطابق یہ فیصلہ کرکٹ مداحوں اور فرنچائز مالکان کی درخواست پر کیا گیا ہے۔ پی ایس ایل 11 کا فائنل 3 مئی کو لاہور کے قذافی اسٹیڈیم میں کھیلا جائے گا، جس کے لیے ٹکٹوں کی فروخت کا شیڈول بھی سامنے آگیا ہے۔
پی سی بی اعلامیے کے مطابق فائنل کے آن لائن ٹکٹ پیر 27 اپریل کو شام 4 بجے سے ویب سائٹ پر دستیاب ہوں گے، جبکہ منگل کی صبح 10 بجے سے لاہور کے 18 مقررہ مراکز سے فزیکل ٹکٹ خریدے جا سکیں گے۔ ٹکٹوں کی کم از کم قیمت 1500 روپے مقرر کی گئی ہے جو جنرل انکلوژرز کے لیے ہوگی، جبکہ فرسٹ کلاس انکلوژرز کے ٹکٹ 2000 روپے میں دستیاب ہوں گے۔
دیگر انکلوژرز میں پریمیئم کے لیے 4000 روپے، وی آئی پی کے لیے 6000 روپے اور وی سی آئی پی کے لیے 8000 روپے قیمت مقرر کی گئی ہے۔ ظہیر عباس انکلوژر کے ٹکٹ 10 ہزار روپے اور پی سی بی گیلری کے ٹکٹ 12 ہزار روپے میں فروخت ہوں گے۔ وزیراعظم نے اس اجازت کے ساتھ ساتھ ملک میں جاری کفایت شعاری مہم پر سختی سے عمل کرنے کی ہدایت بھی کی ہے۔
دیکھئیے:پی ایس ایل 11: ضابطہ اخلاق کی خلاف ورزی پر محمد عامر اور فہیم اشرف پر جرمانہ عائد
