لاہور: پاکستان سپر لیگ (پی ایس ایل) سیزن 11 کے دوسرے ایلیمینیٹر میں حیدرآباد کنگزمین نے سنسنی خیز مقابلے کے بعد اسلام آباد یونائیٹڈ کو 2 رنز سے شکست دے کر فائنل کے لیے کوالیفائی کر لیا ہے۔
قذافی اسٹیڈیم لاہور میں کھیلے گئے میچ میں اسلام آباد یونائیٹڈ کے کپتان نے ٹاس جیت کر حیدرآباد کنگزمین کو پہلے بیٹنگ کی دعوت دی۔ حیدرآباد کنگزمین نے مقررہ 20 اوورز میں 5 وکٹوں کے نقصان پر 186 رنز اسکور کیے۔ عثمان خان نے 61 رنز کی ناقابلِ شکست اننگز کھیلی، جبکہ کپتان مارنوس لیبوشین نے 39، صائم ایوب نے 38 اور کوشال پریرا نے 37 رنز بنائے۔ اسلام آباد کی جانب سے عماد وسیم نے 2 جبکہ کرس گرین، رچرڈ گلیسن اور فہیم اشرف نے ایک، ایک کھلاڑی کو آؤٹ کیا۔
187 رنز کے ہدف کے تعاقب میں اسلام آباد یونائیٹڈ مقررہ 20 اوورز میں 7 وکٹوں پر 184 رنز ہی بنا سکی۔ نمایاں بلے بازوں میں مارک چیپمین نے 43، حیدر علی نے 31، ڈیون کونوے نے 30، شاداب خان نے 22 اور کرس گرین نے 21 رنز اسکور کیے۔
حیدرآباد کنگزمین کی جانب سے فاسٹ بولر حنین شاہ نے آخری اوور میں 6 رنز کا کامیابی سے دفاع کرتے ہوئے اپنی ٹیم کو تاریخی فتح سے ہمکنار کیا۔ حیدرآباد کی جانب سے حنین شاہ اور محمد علی نے 2، 2 جبکہ حسان خان، صائم ایوب اور عاکف جاوید نے ایک، ایک وکٹ حاصل کی۔
واضح رہے کہ پی ایس ایل 11 کا فائنل اتوار کے روز پشاور زلمی اور حیدرآباد کنگزمین کے درمیان قذافی اسٹیڈیم لاہور میں کھیلا جائے گا۔