پاکستان تحریک انصاف (پی ٹی آئی) میں اندرونی اختلافات شدت اختیار کر گئے ہیں، خیبرپختونخوا حکومت نے سابق وزیراعلیٰ علی امین گنڈاپور کے آبائی ضلع ڈیرہ اسماعیل خان کے ترقیاتی فنڈز روک دیے۔
نجی ٹی وی کی رپورٹ کے مطابق وزیراعلیٰ خیبرپختونخوا سہیل آفریدی اور سابق وزیراعلیٰ علی امین گنڈاپور کے درمیان گزشتہ کچھ عرصے سے تعلقات کشیدہ ہیں۔ رپورٹ میں دعویٰ کیا گیا ہے کہ علی امین گنڈاپور نے وزیراعلیٰ سہیل آفریدی کا فون نمبر بھی بلاک کر رکھا ہے۔
قومی اسمبلی کے رکن فیصل امین گنڈاپور نے ڈی آئی خان کے ترقیاتی فنڈز روکے جانے کی تصدیق کی ہے۔ ان کے مطابق خیبرپختونخوا حکومت کی آخری ریلیز میں مجموعی طور پر 43 ارب روپے جاری کیے گئے، تاہم ڈی آئی خان کو صرف 8 کروڑ روپے دیے گئے۔
فیصل امین گنڈاپور نے بتایا کہ ڈی آئی خان میں جاری ترقیاتی منصوبوں کے تحت 50 سے 60 کروڑ روپے سے زائد مالیت کا کام مکمل ہوچکا ہے، تاہم اس کی ادائیگیاں واجبات کی صورت میں باقی ہیں۔
انہوں نے کہا کہ مالی سال 2026-27 کے لیے ان جاری منصوبوں کو صفر بجٹ مختص کیا گیا ہے۔ ان کے مطابق اے ایس ڈی آئی، ڈی آئی خان کے لیے بھی رواں مالی سال کوئی بجٹ مختص نہیں کیا گیا اور اس منصوبے کی بجٹ تخصیص بھی صفر ہے۔
یوں پی ٹی آئی کے اندر جاری اختلافات کے درمیان ڈی آئی خان کے ترقیاتی منصوبوں کے لیے فنڈز کی عدم فراہمی نے معاملے کو مزید نمایاں کردیا ہے۔
دیکھیے: مقبوضہ کشمیر پر بھارتی مؤقف بے بنیاد اور عالمی حقائق کے منافی ہے: پاکستان
