لاہور: داڑھی کے ڈیزائن بنانے کے خلاف پنجاب اسمبلی میں قرارداد جمع کرادی گئی، قرار داد میں کہا گیا ہے داڑھی پر کسی بھی قسم کی ڈیزائننگ سخت گناہ ہے۔
تفصیلات کے مطابق حکمران جماعت پاکستان مسلم لیگ کی رکن پنجاب اسمبلی رخسانہ کوثر کی جانب سے اسمبلی میں ایک قرارداد جمع کرائی گئی ہے۔ رکن اسمبلی نے قرار داد میں مطالبہ کیا ہے داڑھی کے اسٹائل بنانے یا ڈیزائن کرنے پر پابندی لگائی جائے۔
قرار داد میں رکن صوبائی اسمبلی نے داڑھی کو حضور نبی اکرم صلی اللہ علیہ وآلہ وسلم کی سنت قرار دیا اور کہا کہ فیشن کے انداز میں داڑھی بنانا یا تبدیل کرنا نہ صرف سنتِ رسول کی بے حرمتی ہے بلکہ ایک سنگین گناہ بھی ہے۔
قرارداد میں صوبائی حکومت کی توجہ دلائی کہ اس رجحان کو روکنے کے لیے سخت قانون سازی کرے اور ساتھ ساتھ یہ بھی مطالبہ کیا گیا کہ وفاقی حکومت قانون سازی کرکے ڈیزائننگ کرانے والوں اور حجام کیخلاف سخت کارروائی عمل میں لائے۔
یاد رہے کہ یہ پہلا موقع نہیں جب مسلم لیگ ن کی ایم پی اے نے اسپر تشویش کا اظہار کیا ہو بلکہ پانچ برس بھی ایک ایسی قرارداد پیش کی تھی جس میں داڑھی کے مختلف ڈیزائن بنانے پر پابندی کا مطالبہ کیا گیا تھا۔
دیکھیں: عافیہ صدیقی کیس: اسلام آباد ہائیکورٹ نے وفاقی کابینہ کو توہینِ عدالت کا نوٹس جاری کردیا