قطر اور ترکیہ نے دفاعی تعاون سمیت مختلف شعبوں میں تعلقات کو مزید مضبوط بنانے کے لیے 5 معاہدوں اور مفاہمتی دستاویزات پر دستخط کردیے۔ اس موقع پر ترک صدر رجب طیب اردگان اور امیر قطر شیخ تمیم بن حمد آل ثانی کے درمیان استنبول میں ملاقات ہوئی، جس میں دوطرفہ تعلقات، علاقائی صورتحال اور عالمی امور پر تبادلہ خیال کیا گیا۔
ترک ڈائریکٹوریٹ آف کمیونیکیشنز کے مطابق دونوں ممالک کے درمیان طے پانے والے پانچ معاہدوں میں باہمی دفاعی تعاون کا معاہدہ بھی شامل ہے۔ صدر رجب طیب اردگان نے کہا کہ قطر اور ترکیہ کے درمیان دفاعی معاہدہ دونوں برادر ممالک کے تعلقات میں ایک نئی جہت کا اضافہ کرے گا۔
دونوں رہنماؤں کی ملاقات قطر اور ترکیہ کی سپریم اسٹریٹجک کمیٹی کے 12ویں اجلاس کے موقع پر ہوئی۔ اجلاس کے اختتام پر جاری مشترکہ اعلامیے کے مطابق دفاعی معاہدے کے علاوہ تعلیم کے شعبے میں تعاون کا معاہدہ بھی کیا گیا۔
معاہدوں میں امن و مصالحت اور تنازعات کے حل سے متعلق مفاہمتی یادداشت کے ساتھ صارفین کے تحفظ اور مارکیٹ کی نگرانی کے شعبوں میں تعاون کی دستاویز بھی شامل ہے۔
ان پانچ معاہدوں کا مقصد دفاع، تعلیم، سفارت کاری اور دیگر شعبوں میں دونوں ممالک کے درمیان تعاون کو مزید فروغ دینا ہے۔
