ریاض: یمن کے حوثیوں نے سعودی عرب پر ایک بار پھر میزائل اور ڈرون حملے کیے ہیں۔ حملوں میں جنوبی سعودی عرب کے تین شہر نشانے پر آئے۔
سعودی قیادت میں قائم اتحاد کے ترجمان میجر جنرل ترکی المالکی کے مطابق حوثیوں نے خمیس مشیط، ابہا اور جازان کی جانب متعدد بیلسٹک میزائل اور ڈرون داغے۔
ترجمان نے بتایا کہ حملوں میں کسی جانی نقصان کی اطلاع نہیں ملی۔ تاہم، اتحادی افواج نے سعودی عرب کی خودمختاری اور شہریوں کے تحفظ کے لیے مناسب جواب دینے کا اعلان کیا ہے۔
حوثیوں نے حالیہ دنوں میں سعودی عرب کے جنوبی علاقوں میں توانائی اور فوجی تنصیبات کو بھی نشانہ بنایا ہے۔ دوسری جانب سعودی حمایت یافتہ فورسز یمن میں حوثیوں کے خلاف کارروائیاں کر رہی ہیں۔ اس دوران یمن میں لڑائی بھی تیز ہوگئی ہے۔
تازہ حملے اسی بڑھتی ہوئی کشیدگی کے دوران ہوئے ہیں۔ اس صورتحال نے خطے میں سکیورٹی خدشات بھی بڑھا دیے ہیں۔ یمن میں جاری لڑائی کے اثرات بحیرہ احمر تک پہنچنے کا خدشہ بھی ظاہر کیا جا رہا ہے۔ باب المندب خطے کی اہم بحری گزرگاہوں میں شامل ہے۔
دیکھیے: سعودی عرب پر حوثی حملے: پاکستان نے ایران کو خبردار کر دیا
