سعودی عرب میں شیبہ آئل فیلڈ اور دمام کے کنگ فہد انٹرنیشنل ایئرپورٹ پر الگ الگ حملوں میں 3 افراد ہلاک اور 10 زخمی ہو گئے۔ ہلاک ہونے والوں میں فلپائن اور نیپال کے شہری شامل ہیں، جبکہ زخمیوں میں پاکستانی اور بھارتی شہری بھی شامل ہیں۔
سعودی حکام کے مطابق دمام ایئرپورٹ پر حملے میں ایک شخص ہلاک اور 8 افراد زخمی ہوئے۔ زخمیوں کو طبی امداد کے لیے اسپتال منتقل کر دیا گیا ہے۔
آئل فیلڈ پر ڈرون حملے
سعودی وزارت توانائی کے مطابق مشرقی صوبے میں واقع آرامکو کی شیبہ آئل فیلڈ کو نشانہ بنانے والے ڈرون کو فضائی دفاعی نظام نے تباہ کر دیا۔ ڈرون کا ملبہ گرنے سے فلپائن اور نیپال سے تعلق رکھنے والے دو افراد ہلاک جبکہ پاکستان اور بھارت کے ایک ایک شہری زخمی ہوئے۔
وزارت توانائی کے مطابق ملبہ گرنے سے آئل فیلڈ میں کام کرنے والے ایک ٹھیکیدار کی گاڑی میں بھی آگ لگ گئی۔ گاڑی تنصیب کی حدود سے باہر موجود تھی۔
سعودی حکام کا کہنا ہے کہ واقعے کے باوجود شیبہ آئل فیلڈ کی سرگرمیاں متاثر نہیں ہوئیں اور وہاں کام معمول کے مطابق جاری رہا۔
دمام ایئرپورٹ پر حملہ
سعودی جنرل اتھارٹی آف سول ایوی ایشن کے مطابق دمام میں کنگ فہد انٹرنیشنل ایئرپورٹ پر حملے کے نتیجے میں ایک شخص ہلاک اور 8 زخمی ہوئے۔ حکام نے زخمیوں کی حالت اور حملے میں استعمال ہونے والے ہتھیار سے متعلق مزید تفصیلات جاری نہیں کیں۔
دوسری جانب سعودی قیادت میں قائم اتحاد نے مشرقی علاقے میں متعدد ڈرون مار گرانے کا دعویٰ کیا ہے۔
