جنگِ ستمبر 1965 کے چوتھے روز پاک فوج نے مختلف محاذوں پر بھارتی فوج کا بھرپور مقابلہ کیا اور اسے پسپا ہونے پر مجبور کردیا۔
ستمبر 1965 کی جنگ کے چوتھے روز بھارتی وزیر خارجہ اندرا گاندھی نے دعویٰ کیا کہ بھارت کشمیر کا تنازع طاقت کے ذریعے حل کرے گا۔
دوسری جانب چین نے پاکستان کی حمایت کی۔ چینی وزیر خارجہ نے بھارت کو جارحیت کا ذمہ دار قرار دیا۔ چین کے سرکاری اخبار پیپلز ڈیلی نے بھی بھارتی فوج کی پاکستانی سرزمین میں مداخلت کی مذمت کی۔
جنگ کے دوران جی ایچ کیو نے تمام فارمیشنز کو بھارت کے خلاف دفاعی اقدامات کرنے کی ہدایت کی۔
اسی دوران پاک بحریہ نے بھی اپنی سمندری حدود میں دفاعی پوزیشن سنبھال لی۔ نیول کمانڈ نے بھارتی بحریہ کی نقل و حرکت پر نظر رکھنے کے لیے اہم بحری وسائل کو تیار رہنے کا حکم دیا۔
پی این ایس غازی کو بھارتی بحری جہازوں سے لاحق خطرے سے نمٹنے کی ذمہ داری بھی سونپی گئی۔
شبیر شریف کی بہادری
جوڑیاں سیکٹر میں 6 فرنٹیئر فورس رجمنٹ کی ایک پلاٹون نے تروٹی کے اہم بھارتی مورچے پر حملہ کیا۔ اس کارروائی کی قیادت سیکنڈ لیفٹیننٹ شبیر شریف نے کی۔
معرکے کے دوران کئی پاکستانی جوان شہید ہوئے۔ تاہم، سیکنڈ لیفٹیننٹ شبیر شریف نے اپنی قیادت اور بہادری سے دستے کو دوبارہ منظم کیا۔
انہوں نے اپنے جوانوں کو بھارتی فوج کے نرغے سے نکالا۔ اس کے بعد دوبارہ حملہ کیا اور 6 شہدا کے جسد خاکی سمیت 15 زخمی جوانوں کو محفوظ مقام تک پہنچایا۔
سیکنڈ لیفٹیننٹ شبیر شریف نے تیسری مرتبہ حملہ کیا۔ اس کارروائی کے نتیجے میں ایک بھارتی آرٹلری گن کو بھی پیچھے ہٹنے پر مجبور ہونا پڑا۔
ستارۂ جرات سے نوازا گیا
بے مثال قیادت، بہادری اور جنگی صلاحیت کے اعتراف میں سیکنڈ لیفٹیننٹ شبیر شریف کو ستارۂ جرات سے نوازا گیا۔
دریں اثنا، پاکستان ایئر فورس نے بھی پاکستانی فضائی حدود کی خلاف ورزی کی بھارتی فضائیہ کی کوشش ناکام بنا دی۔
جنگِ ستمبر 1965 کا چوتھا روز پاک فوج، پاک بحریہ اور پاک فضائیہ کی دفاعی صلاحیت اور جوانوں کی بہادری کی نمایاں مثال کے طور پر یاد کیا جاتا ہے۔