خیبرپختونخوا کے ضلع جنوبی وزیرستان میں سیکیورٹی فورسز نے چوکی پر دہشت گرد حملہ ناکام بنا دیا۔ جوابی کارروائی میں خودکش بمبار سمیت چار خوارج ہلاک ہو گئے۔
آئی ایس پی آر کے مطابق جنوبی وزیرستان میں ایک چیک پوسٹ پر بھارتی سرپرستی میں سرگرم فتنہ الخوارج سے تعلق رکھنے والے دہشت گردوں نے حملے کی کوشش کی۔
سیکیورٹی فورسز نے بروقت اور مؤثر کارروائی کرتے ہوئے حملے کو ناکام بنا دیا۔ حملہ آور دھماکا خیز مواد سے بھری گاڑی کے ذریعے چیک پوسٹ کی سیکیورٹی توڑنے کی کوشش کر رہے تھے۔
آئی ایس پی آر کے مطابق سیکیورٹی فورسز نے چوکی کے احاطے سے باہر ہی گاڑی کو نشانہ بنا کر تباہ کر دیا، جس کے نتیجے میں خودکش بمبار موقع پر ہلاک ہو گیا اور فورسز کو کوئی نقصان نہیں پہنچا۔
باقی تین دہشت گرد قریبی عمارت میں چھپ گئے، جہاں سیکیورٹی فورسز نے کلیئرنس آپریشن کرتے ہوئے تینوں کو ہلاک کر دیا۔ کارروائی کے دوران سیکیورٹی فورسز کا کوئی جانی نقصان نہیں ہوا۔
علاقے میں مزید دہشت گردوں کی موجودگی کے خدشے کے پیش نظر سرچ اور کلیئرنس آپریشن جاری ہے۔
دیکھیے: ٹانک میں فتنہ الخوارج کا حملہ ناکام، 12 دہشتگرد ہلاک، 15 جوان شہید