امریکی وزیرِ خارجہ مارکو روبیو نے ایران کو سخت خبردار کرتے ہوئے کہا ہے کہ صدر ڈونلڈ ٹرمپ تہران کے خلاف ایسی کارروائی کے لیے مکمل تیار ہیں جو ماضی کی کسی انتظامیہ نے نہیں کی۔
اپنے ایک اہم بیان میں مارکو روبیو کا کہنا تھا کہ ایران نے آج تک ڈونلڈ ٹرمپ جیسے صدر کے فیصلوں کی صلاحیت رکھنے والے صدر کا سامنا نہیں کیا۔ انہوں نے واضح کیا کہ ایران اب نتائج سے خالی اور لاحاصل مذاکرات کی توقع بالکل نہ رکھے۔
امریکی وزیرِ خارجہ نے صدر ٹرمپ کا موقف دہراتے ہوئے الزام عائد کیا کہ ایران دہائیوں سے جھوٹ بول رہا ہے، عالمی معاہدوں کی خلاف ورزی کر رہا ہے اور دنیا کو مذاکراتی فریب میں الجھا رہا ہے۔
دوسری جانب وائٹ ہاؤس کے حکام نے بھی سخت موقف اختیار کرتے ہوئے کہا ہے کہ جب تک ایران با مقصد اور جاندار مذاکرات کی طرف نہیں لوٹتا، اسے امریکہ اور اس کے اتحادیوں کی جانب سے مسلسل بھاری قیمت چکانی پڑے گی۔