سکیورٹی فورسز نے خیبر پختونخوا اور بلوچستان کے مختلف علاقوں میں انٹیلی جنس کی بنیاد پر کارروائیاں کرتے ہوئے گزشتہ 24 گھنٹوں کے دوران 32 دہشت گردوں کو ہلاک کر دیا۔
آئی ایس پی آر کے مطابق سکیورٹی فورسز نے بھارتی سرپرستی میں سرگرم فتنۃ الخوارج’ اور ‘فتنۃ الہندوستان کے نیٹ ورکس کے خلاف کے پی اور بلوچستان میں مشترکہ ٹارگٹڈ آپریشنز کیے۔
ترجمان پاک فوج کے مطابق 28 اور 29 جولائی کی درمیانی شب ضلع خیبر میں کیے گئے متعدد آپریشنز کے دوران فورسز نے دہشت گردوں کے ٹھکانوں کو مؤثر انداز میں نشانہ بنایا، جس کے نتیجے میں فتنۃ الخوارج کے 24 دہشت گرد مارے گئے۔
دوسری جانب بلوچستان کے ضلع نوشکی میں انٹیلی جنس بیسڈ آپریشن کے دوران شدید فائرنگ کے تبادلے میں فتنۃ الہندوستان سے تعلق رکھنے والے 8 دہشت گرد ہلاک ہوئے۔ کارروائیوں کے دوران بھاری مقدار میں اسلحہ، گولہ بارود اور دھماکا خیز مواد برآمد کر کے تباہ کر دیا گیا۔
آئی ایس پی آر کے مطابق علاقوں میں مزید دہشت گردوں اور ان کے سہولت کاروں کے خاتمے کے لیے کلیئرنس آپریشنز جاری ہیں۔
ترجمان پاک فوج نے اعادہ کیا کہ نیشنل ایکشن پلان اور عزمِ استحکام کے وژن کے تحت سکیورٹی فورسز اور قانون نافذ کرنے والے ادارے بیرونی سرپرستی میں ہونے والی دہشت گردی کے مکمل خاتمے تک اپنی کارروائیاں پوری قوت کے ساتھ جاری رکھیں گے۔
دیکھیے: افغانستان میں مزاحمت کا دائرہ وسیع، پنجشیر و بدخشاں کے بعد سرپل میں طالبان رہنما قتل
