پشاور: پی ڈی ایم اے نے 24 گھنٹوں میں ہونے والی بارشوں اور فلش فلڈ کے باعث خیبر پختونخوا میں ہونے والے جانی و مالی نقصانات کی رپورٹ جاری کردی۔
گذشتہ 24 گھنٹوں کے دوران بارشوں اور فلش فلڈ کے باعث مختلف حادثات میں اب تک 43 افراد جاں بحق اور 14 زخمی ہوے۔ جاں بحق ہونے والوں میں 33 مرد، 2 خواتین اور 8 بچے شامل ہیں جبکہ زخمیوں میں 11 مرد، 2 خواتین اور1 بچہ شامل ہے۔ پی ڈی ایم اے
بارشوں اور فلش فلڈ کے باعث پی ڈی ایم اے کی رپورٹ کے مطابق مجموعی طور پر 30 گھر متاثر ہوئے، جن میں پانچ گھر مکمل طور پر منہدم ہوگئے۔
رپورٹ کے مطابق یہ حادثات خیبر پختونخوا کے مختلف اضلاع میں پیش آئے، جن میں سوات، بونیر ، باجوڑ، تورغر، مانسہرہ، شانگلہ اور بٹگرام شامل ہیں۔
سب سے زیادہ متاثرہ علاقے باجوڑ اور بٹگرام ہیں جہاں ہنگامی بنیادوں پر ریسکیو آپریشن جاری ہے۔
محکمہ موسمیات کے مطابق ان بارشوں کا سلسلہ 21 اگست تک وقفے وقفے سے جاری رہنے کا امکان ہے۔
پی ڈی ایم اے نے قبل از وقت موسمی صورتحال کے پیش نظر انتظامیہ کو اقدامات اٹھانے کے لئے ہدایات جاری کردی تھی۔
پی ڈی ایم اے نے تمام متعلقہ اداروں کو متاثرہ شاہراوں کی بحالی کے لیے تمام وسائل بروئے کار لانے کے احکامات جاری کردیے ہیں۔ نیز سیاحوں کو موسمی صورتحال کو مدّنظر رکھتے ہوئے سیر و سیاحت کے لیے نکلنے کی اپیل کی ہے۔
موسمی صورتحال پر نظر رکھتے ہوئے پی ڈی ایم اے کا ایمرجنسی آپریشن سنٹر مکمل طور پر فعال ہے۔ عوام کسی بھی نا خوشگوار واقعے کی اطلاع اور معلومات کے لیے فری ہیلپ لائن 1700 پر رابطہ کریں۔ ترجمان پی ڈی ایم اے
دیکھیں: کولگام میں بھارتی فوج کا آپریشن دسویں روز بھی جاری، دو اہلکار ہلاک ہو گئے