پاکستان نے ایشین انڈر-16 والی بال چیمپئن شپ 2025 کے فائنل میں ایران کو 2-3 سے شکست دے دی۔ پاکستان کی ٹیم نے پہلے دو سیٹ ہارنے کے باوجود شاندار واپسی کرتے ہوئے اگلے تین سیٹس جیتے اور چیمپئن شپ اپنے نام کر لی۔
چیمپئن شپ میں کُل 16 ٹیموں نے حصہ لیا جو کہ ایشین والی بال فیڈریشن اور تھائی والی بال ایسوسی ایشن کے زیر اہتمام منعقد کی گئی۔ یہ اس ایونٹ کا دوسرا ایڈیشن تھا جو ہر دو سال بعد منعقد ہوتا ہے۔
اس سے قبل بھارت نے جاپان کو 2-3 سے شکست دے کر تیسری پوزیشن حاصل کی اور کانسی کا تمغہ جیتا۔
یہ ایونٹ اے وی آئی ایف بوائز انڈر-17 ورلڈ چیمپئن شپ کے کوالیفائنگ ٹورنامنٹ کے طور پر بھی منعقد کیا گیا تھا۔ اس جیت کے ساتھ پاکستان، ایران، جاپان اور بھارت نے عالمی چیمپئن شپ کے لیے کوالیفائی کر لیا ہے۔
یاد رہے کہ پاکستان نے تاریخ میں پہلی مرتبہ ایشین انڈر 16 والی بال چیمپئن شپ جیتی ہے۔
پاکستان والی بال فیڈریشن اور شائقین نے اس کامیابی کو ملک کے لیے فخر کا لمحہ قرار دیا ہے اور امید ظاہر کی ہے کہ یہ نوجوان مستقبل میں بھی قومی پرچم کو سربلند رکھیں گے۔
دیکھیں: اسحاق ڈار کابل پہنچ گئے، آج سہہ فریقی نشستوں میں حصہ لیں گے