خیبر پختونخوا کے ضلع چارسدہ میں فتنہ الخوارج کی پرتشدد کاروائیوں اور علمائے کرام کو نشانہ بنانے کے خلاف عوامی غم و غصے کی شدید لہر دوڑ گئی ہے۔ مقامی شہریوں نے شہر کی مختلف دیواروں پر دہشت گرد سرغنہ نور ولی کے خاکوں پر لعنت اور نفرین لکھ کر اپنی نفرت اور بیزاری کا برملا اظہار کیا ہے۔
رپورٹ کے مطابق معروف عالمِ دین مولانا شیخ ادریس کی المناک شہادت کے بعد علاقے میں کشیدگی اور عوامی اشتعال میں اضافہ ہوا ہے۔ شہریوں کا کہنا ہے کہ اسلام کے نام پر معصوم انسانوں کا خون بہانے والے کسی رعایت کے مستحق نہیں۔
حالیہ دنوں میں جمعیت علمائے اسلام کے سربراہ مولانا فضل الرحمٰن سمیت دیگر ممتاز مذہبی اسکالرز کی جانب سے خوارج کے خلاف واضح اور دو ٹوک مؤقف سامنے آنے کے بعد عوامی سطح پر ان گروہوں کے بارے میں مذمتی کی تحریک نے زور پکڑ لیا ہے۔
دیواروں پر تحریر کردہ نعروں میں واضح کیا گیا ہے کہ “اسلام کے نام پر دہشت گردی نامنظور” ہے۔ عوامی حلقوں کا مؤقف ہے کہ مساجد، مدارس اور جید علمائے کرام پر حملے کر کے ان عناصر نے ثابت کر دیا ہے کہ ان کا دینِ اسلام اور انسانیت سے کوئی تعلق نہیں ہے۔
شہریوں نے اس عزم کا اظہار کیا ہے کہ وہ امن دشمن عناصر کے کسی بھی بیانیے کو قبول نہیں کریں گے اور دہشت گردی کے خلاف سیکورٹی فورسز اور ریاست کے ساتھ کھڑے ہیں۔
دیکھیے: افغانستان میں علماء کے قتل پر خاموشی برقرار، طالبان کے سکیورٹی دعوے بے نقاب