امریکہ نے ایران کے خلاف اپنی فوجی کارروائیوں کا سلسلہ جاری رکھتے ہوئے مسلسل نویں رات بھی حملے کیے، جس سے خلیجی خطے میں کشیدگی مزید بڑھ گئی ہے۔ انحملوں میں تبریز، چابہار، سیرک، ہرمزگان، بوشہر اور کناراک سمیت ایران کے مختلف شہروں کو نشانہ بنائے جانے کی اطلاعات ہیں
دوسری جانب برطانوی میری ٹائم ایجنسی نے بتایا ہے کہ عمان کے علاقے کُمزار کے قریب ایک بحری جہاز میں آتشزدگی کا واقعہ پیش آیا ہے، تاہم آگ لگنے کی وجہ تاحال معلوم نہیں ہو سکی۔
ایران نے جوابی کارروائی کرتے ہوئے دشمن کے اہداف کی جانب نئے میزائل داغنے کا اعلان کیا ہے، جبکہ کویت نے دعویٰ کیا ہے کہ اس کی فضائی دفاعی نظام نے ان حملوں کو ناکام بنا دیا۔
اسی دوران بحرین میں سائرن بجنے کی اطلاعات سامنے آئیں، جس پر بحرین میں موجود امریکی سفارت خانے نے دارالحکومت منامہ میں شہریوں کو ممکنہ ایرانی حملے کے پیش نظر محتاط رہنے کی ہدایت جاری کی۔
ایرانی پاسدارانِ انقلاب کے مطابق آبنائے ہرمز کے جنوبی راستے سے گزرنے کی کوشش کرنے والے دو تیل بردار ٹینکروں کو دھماکے سے تباہ کر دیا گیا۔ پاسداران انقلاب نے خبردار کیا ہے کہ جب تک خطے میں امریکی کارروائیاں جاری رہیں گی، آبنائے ہرمز کسی بھی جہاز کے لیے محفوظ گزرگاہ تصور نہیں کی جائے گی۔
اردن کے عقبہ ہوائی اڈے پر بھی امریکی طیاروں کو بیلسٹک میزائلوں کے ذریعے نشانہ بنایا گیا۔ ادھر ایرانی پاسداران انقلاب نے شام کے علاقے التنف میں ایک کمانڈ سینٹر پر حملے کا دعویٰ کیا ہے، جسے ایران شہر میں ہلاک ہونے والے فوجیوں کے خون کا بدلہ قرار دیا گیا۔
دیکھیے: امریکا کے ایران پر مسلسل آٹھویں رات حملے، ایرانی تنصیبات کو نشانہ بنانے کا دعویٰ
