پاسدارانِ انقلاب کا کہنا ہے کہ ایرانی فوج امریکی مداخلت کا فوری اور مؤثر جواب دینے کے لیے مکمل طور پر تیار ہے۔
ایرانی خبر رساں ادارے تسنیم نیوز کے مطابق پاسدارانِ انقلاب کے جاری کردہ بیان میں کہا گیا ہے کہ ایرانی زمینی افواج جدید ساز و سامان، مسلسل تربیت اور آپریشنل صلاحیتوں میں بہتری کی بدولت کسی بھی ممکنہ امریکی دراندازی کا فوری اور مؤثر جواب دینے کے لیے تیار ہیں۔
پاسدارانِ انقلاب کا کہنا ہے کہ مسلح افواج کی مسلسل چوکسی اور ہر وقت آپریشنل تیاری ملک کے پائیدار تحفظ کی ضمانت ہے۔
بیان میں مزید کہا گیا ہے کہ اس مقصد کے لیے تمام آپریشنل شعبوں میں سنجیدگی کے ساتھ تیاری برقرار رکھی جا رہی ہے۔
آئی آر جی سی کی زمینی افواج کے ڈپٹی کمانڈر بریگیڈیئر جنرل روح اللہ نوری نے کہا کہ ایرانی فورسز کسی بھی دشمن کی دراندازی کو ناکام بنانے کی مکمل صلاحیت رکھتی ہیں۔
واضح رہے کہ ایران اور امریکہ کے درمیان کشیدگی مسلسل نویں روز بھی جاری ہے، جبکہ ایرانی وزیرِ خارجہ عباس عراقچی پہلے ہی واضح کر چکے ہیں کہ امریکا سے جنگ اس وقت ختم ہوگی جب ایران کو برتری حاصل ہوگی۔
دیکھیے: ایران کی جوابی کارروائی، امریکی طیاروں اور فوجی تنصیبات کو نشانہ بنانے کا دعویٰ
