پاسداران انقلاب نے کہا ہے کہ اردن کے عقبہ ایئرپورٹ پر موجود امریکی فوج کے سی-17 ٹرانسپورٹ طیاروں اور پی-8 نگرانی طیاروں کو بیلسٹک میزائل حملوں کا نشانہ بنایا گیا۔
ایرانی نشریاتی ادارے کے مطابق ان حملوں کے نتیجے میں متعدد امریکی طیاروں کو شدید نقصان پہنچا۔ پاسداران انقلاب نے مزید بتایا کہ اردن کے موفق السلطی (الازرق) ایئربیس پر امریکی افواج کے زیرِ استعمال 20 ہینگرز بھی تباہ کر دیے گئے ہیں۔
ایک اور بیان میں یہ دعویٰ کیا ہے کہ کویت کے علی السالم ایئربیس پر موجود امریکی فوجی تنصیبات کو بھی نشانہ بنایا گیا۔
اسی طرح علیحدہ حملوں میں فضائی ساز و سامان کے گودام اور ایم کیو-9 ڈرونز کے ہینگر کو بھی نشانہ بنایا گیا، جس سے کئی طیاروں میں آگ بھڑک اٹھی۔
ایرانی خبر رساں ادارے تسنیم کے مطابق پاسداران انقلاب نے بتایا کہ گزشتہ رات آبنائے ہرمز میں دو آئل ٹینکر دھماکوں کے باعث رک گئے۔ بیان میں کہا گیا ہے کہ یہ جہاز امریکی دباؤ کے تحت اس اہم بحری گزرگاہ سے گزرنے کی کوشش کر رہے تھے۔
پاسداران انقلاب نے خبردار کیا ہے کہ جب تک خطے میں امریکی فوجی کارروائیاں جاری رہیں گی، آبنائے ہرمز تیل، گیس یا دیگر تجارتی سامان کی محفوظ ترسیل کے لیے غیر محفوظ رہے گی۔
ایرانی خبر رساں ادارے کے مطابق ایران کے مغربی صوبے کرمانشاہ کے شہر اسلام آبادِ غرب کے قریب بھی ایک ایم کیو-9 ڈرون مار گرایا گیا۔
رپورٹ کے مطابق اس ڈرون کو آئی آر جی سی کی ایرو اسپیس فورس کے جدید فضائی دفاعی نظام نے ایران کے مربوط فضائی دفاعی نیٹ ورک کی مدد سے نشانہ بنایا۔
دیکھیے: امریکہ اپنی ناکامی چھپانے کے لیے ایران پر حملے کر رہا ہے، پاسدارانِ انقلاب