لوئر دیر کے علاقے سربندہ میدان میں فورسز نے سیکیورٹی چیک پوسٹ پر دہشت گردوں کا حملہ ناکام بنا دیا ہے۔ عسکریت پسندوں نے چیک پوسٹ کو چھوٹے اور بھاری ہتھیاروں سے نشانہ بنانے کی کوشش کی۔
سکیورٹی فورسز نے حملے پر فوری اور مؤثر جوابی کارروائی کی، جس کے نتیجے میں شدید فائرنگ کا تبادلہ ہوا۔ فائرنگ کے تبادلے کے دوران 2 دہشت گرد ہلاک ہو گئے جبکہ متعدد عسکریت پسندوں کے زخمی ہونے کی اطلاعات ہیں۔
سکیورٹی ذرائع کے مطابق آپریشن کے دوران ایک ہلاک دہشت گرد کی لاش برآمد کر لی گئی ہے۔ شدید جھڑپ کے دوران فورسز کا ایک اہلکار زخمی ہوا جسے فوری طبی امداد کے لیے منتقل کر دیا گیا ہے۔
واقعے کے فوراً بعد سکیورٹی فورسز نے پورے علاقے کو گھیرے میں لے کر سرچ اور کلیئرنس آپریشن شروع کر دیا ہے تاکہ فرار ہونے والے دہشت گردوں کو انجام تک پہنچایا جا سکے۔
دیکھیے: خیبر پختونخوا میں سکیورٹی آپریشن، فتنہ الخوارج کے 8 دہشت گرد ہلاک، 15 زخمی
