اقوام متحدہ میں پاکستان کے مستقل مندوب عاصم افتخار احمد نے کہا ہے کہ افغانستان سے دہشتگردی کے خطرے پر پاکستان اپنے دفاع کا حق استعمال کرے گا۔ ان کے مطابق ضرورت پڑنے پر کارروائی کی جائے گی اور بین الاقوامی قانون کو ملحوظ رکھا جائے گا۔
سلامتی کونسل کے اجلاس سے خطاب کرتے ہوئے عاصم افتخار نے کہا کہ پاکستان اپنے شہریوں اور قومی سلامتی کو لاحق خطرات پر خاموش نہیں رہ سکتا۔
انہوں نے دعویٰ کیا کہ گزشتہ تین برس کے دوران افغانستان سے آنے والی دہشتگردی کے نتیجے میں 4 ہزار 700 سے زیادہ پاکستانی جانیں گنوا چکے ہیں۔ پاکستان کا کہنا ہے کہ افغان سرزمین پر موجود بعض دہشتگرد گروہ پاکستان کے لیے مسلسل خطرہ ہیں۔
عاصم افتخار نے ٹی ٹی پی، بلوچ لبریشن آرمی، مجید بریگیڈ، داعش خراسان اور مشرقی ترکستان اسلامی تحریک سمیت مختلف گروہوں کا ذکر کیا۔ ان کے مطابق ان گروہوں کی افغانستان میں موجودگی اور سرگرمیاں خطے کی سلامتی کے لیے تشویش کا باعث ہیں۔
پاکستانی مندوب نے الزام عائد کیا کہ افغان طالبان نے ان گروہوں کے خلاف مؤثر اور قابل تصدیق کارروائی نہیں کی۔ افغانستان نے ماضی میں پاکستان کے ایسے الزامات کو مسترد کرتے ہوئے اسلام آباد پر مسائل براہِ راست حل کرنے پر زور دیا ہے۔
افغان صورتحال پر عالمی تشویش
اقوام متحدہ کی تازہ رپورٹ میں بھی افغانستان میں دہشتگرد گروہوں کی موجودگی کا ذکر کیا گیا ہے۔ رپورٹ میں خواتین اور لڑکیوں پر پابندیوں، انسانی حقوق اور معاشی مشکلات سمیت دیگر مسائل بھی اجاگر کیے گئے ہیں۔
اجلاس میں امریکہ نے دہشتگردی، زیر حراست امریکی شہریوں اور خواتین و لڑکیوں پر پابندیوں سے متعلق تحفظات کا اظہار کیا۔ دوسری جانب روس نے افغانستان کے ساتھ رابطے اور عملی مذاکرات جاری رکھنے کی حمایت کی۔
چین نے بھی افغانستان کے ساتھ رابطے برقرار رکھنے پر زور دیا۔ چینی نمائندے نے خواتین سمیت تمام افغان شہریوں کے بنیادی حقوق کے تحفظ کی ضرورت پر زور دیا۔
پاکستانی مندوب کے مطابق پاکستان نے افغانستان میں انسانی امداد اور علاقائی تعاون کی کوششوں کی حمایت جاری رکھی ہے۔ ان کا کہنا تھا کہ دہشتگردی کے خطرات کے باوجود پاکستان افغانستان کے ساتھ انسانی بنیادوں پر تعاون بھی جاری رکھے ہوئے ہے۔
عاصم افتخار نے واضح کیا کہ پاکستان اپنے شہریوں اور قومی سلامتی کے تحفظ کے لیے ضرورت پڑنے پر دفاعی اقدامات کرے گا۔ ان کے مطابق ایسے اقدامات بین الاقوامی قانون کے مطابق ہوں گے۔
دیکھیے: ہیبت اللہ کا خفیہ خط: دہشت گردوں کو محفوظ پناہ گاہیں فراہم کرنے کا انکشاف
