پاکستان نے باب المندب میں تجارتی جہازوں پر حوثی ملیشیا کے حملوں کی مذمت کرتے ہوئے ان کارروائیوں کی فوری بندش کا مطالبہ کیا ہے۔
اقوام متحدہ کی سلامتی کونسل کے اجلاس سے خطاب کرتے ہوئے پاکستان کے مستقل نمائندے عاصم افتخار احمد نے کہا کہ حوثی ملیشیا اشتعال انگیز کارروائیاں فوری طور پر بند کرے۔
انہوں نے کہا کہ ایسی کارروائیوں کے بحری سلامتی، علاقائی امن اور استحکام پر سنگین اثرات مرتب ہوسکتے ہیں۔
بحری راستوں پر تشویش
پاکستانی مندوب نے کہا کہ باب المندب اور آبنائے ہرمز میں تجارتی جہاز رانی کو درپیش رکاوٹیں ظاہر کرتی ہیں کہ سمندری بحران کے اثرات متاثرہ علاقوں تک محدود نہیں رہتے۔
ان کے مطابق اہم بحری گزرگاہوں میں غیر یقینی صورتحال سے عالمی تجارت، توانائی کی قیمتوں اور غذائی تحفظ کو بھی خطرات لاحق ہیں۔
عاصم افتخار نے کہا کہ پاکستان کو آبنائے ہرمز میں تجارتی جہازوں پر حملوں سمیت پیدا ہونے والی رکاوٹوں پر بھی گہری تشویش ہے۔
سعودی عرب سے یکجہتی
پاکستانی مندوب نے سعودی عرب کو درپیش حوثی کارروائیوں کو کھلی اور بلااشتعال جارحیت قرار دیتے ہوئے سعودی عرب کی خودمختاری، علاقائی سالمیت اور سلامتی کے لیے پاکستان کی حمایت کا اعادہ کیا۔
انہوں نے کہا کہ پاکستان سعودی قیادت، حکومت اور عوام کے ساتھ مکمل یکجہتی میں کھڑا ہے۔
عاصم افتخار نے مزید کہا کہ پاکستان سمندر اور خشکی پر معمول کے حالات کی جلد بحالی کے لیے تمام زیرِ التوا مسائل کا مذاکرات کے ذریعے حل تلاش کرنے کی کوششیں جاری رکھے گا۔
پاکستانی مندوب کے مطابق ملک خطے اور دیگر امن پسند ممالک کے ساتھ مل کر سمندری امن و سلامتی اور تجارتی جہازوں کے تحفظ کے لیے مزید اقدامات کا خواہاں ہے۔
دیکھیے: سعودی عرب کے دفاع کیلئے پاکستان کسی بھی حد تک جائے گا: ڈی جی آئی ایس پی آر
