بلوچستان کے اضلاع کچھی اور وڈھ میں سکیورٹی فورسز کی دو کارروائیوں کے دوران 9 دہشت گرد ہلاک ہوگئے، جبکہ ٹھکانوں سے اسلحہ اور گولہ بارود بھی برآمد کیا گیا۔
آئی ایس پی آر کے مطابق ضلع کچھی میں انٹیلی جنس معلومات کی بنیاد پر آپریشن کیا گیا۔ اس دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس میں 7 دہشت گرد ہلاک ہوگئے۔
کارروائی کے دوران دہشت گردوں کا ٹھکانہ تباہ کر دیا گیا، جبکہ وہاں سے اسلحہ اور گولہ بارود بھی برآمد کیا گیا۔
آئی ایس پی آر کے مطابق ضلع وڈھ میں سکیورٹی فورسز نے دہشت گردوں کی نقل و حرکت کا سراغ لگایا اور ان کے خلاف کارروائی کی۔ فائرنگ کے تبادلے میں 2 دہشت گرد ہلاک ہوگئے۔ اس کارروائی کے دوران بھی اسلحہ اور گولہ بارود برآمد کیا گیا۔
کلیئرنس آپریشن جاری
آئی ایس پی آر کے مطابق دونوں علاقوں میں ممکنہ طور پر موجود دیگر دہشت گردوں کی تلاش اور خاتمے کے لیے کلیئرنس آپریشن جاری ہیں۔
بیان میں کہا گیا ہے کہ سکیورٹی فورسز اور قانون نافذ کرنے والے اداروں کی جانب سے ملک میں بیرونی سرپرستی میں ہونے والی دہشت گردی کے خاتمے کے لیے کارروائیاں جاری رہیں گی۔
آئی ایس پی آر نے قومی ایکشن پلان کی حکمت عملی اور عزمِ استحکام کے تحت انسدادِ دہشت گردی کی مہم پوری رفتار سے جاری رکھنے کے عزم کا بھی اعادہ کیا۔
