ہم صیہونیوں کے خلاف لڑائی میں پاکستان کی حمایت نہیں بھولیں گے؛ علی لاریجانی کا دورہ پاکستان

ایران کے سابق اسپیکرِ پارلیمنٹ اور اسلامی جمہوریہ ایران کی سپریم نیشنل سیکیورٹی کونسل کے معزز سیکریٹری، ڈاکٹر علی لاریجانی نے اعلان کیا ہے کہ وہ آج پاکستان کے ایک اہم اور خصوصی دورے پر روانہ ہو رہے ہیں۔ روانگی سے قبل اپنے بیان میں انہوں نے پاکستان کو ایران کا دوست، برادر اور قابلِ اعتماد پڑوسی قرار دیتے ہوئے کہا کہ دونوں ممالک خطے کے امن، استحکام اور باہمی تعاون کے لیے بنیادی کردار رکھتے ہیں۔

علی لاریجانی نے کہا کہ ایرانی عوام کبھی نہیں بھولے گی کہ امریکہ اور صہیونی رجیم کی جانب سے ایران پر مسلط کی گئی 12 روزہ جنگ کے دوران پاکستانی قوم نے جس خلوص، ہمدردی اور یکجہتی کا اظہار کیا، وہ ایران کی اجتماعی یادداشت کا ہمیشہ حصہ رہے گا۔ انہوں نے کہا کہ دونوں ملکوں کے درمیان اعتماد، قربت اور تاریخی وابستگی خطے میں ایک منفرد مثال ہے۔

اس دورے کو غیر معمولی اور بے مثال قرار دیتے ہوئے تہران نے واضح کیا ہے کہ پاکستان کے ساتھ تعلقات پہلے سے مضبوط ہیں، تاہم موجودہ عالمی اور علاقائی صورت حال دونوں ممالک کے لیے نئے اور مشترکہ چیلنجز لے کر آئی ہے، جن سے نمٹنے کے لیے مزید اشتراکِ فکر، پالیسی ہم آہنگی اور اسٹریٹجک تعاون ناگزیر ہو چکا ہے۔

سرکاری ذرائع کے مطابق ڈاکٹر علی لاریجانی کا یہ دورہ ایسے وقت میں ہو رہا ہے جب خطے کا جغرافیائی سیاسی ماحول تیزی سے تبدیل ہو رہا ہے۔ افغانستان کی صورتحال، مشرقِ وسطیٰ میں تنازعات، عالمی طاقتوں کا بدلتا توازن اور اقتصادی راہداریوں کی اہمیت نے پاکستان اور ایران دونوں کو اس جانب مزید متوجہ کیا ہے کہ وہ اپنے باہمی تعلقات کو اسٹریٹجک گہرائی دیں اور مختلف شعبوں میں پائیدار تعاون کو فروغ دیں۔

دورے کے دوران لاریجانی کی پاکستان کی اعلیٰ شخصیات سے ملاقاتیں متوقع ہیں۔ گفتگو کا محور سرحدی نظم و نسق، انسدادِ دہشت گردی، اقتصادی تعاون، توانائی کے منصوبے، تجارتی راستوں کی بحالی، علاقائی سفارت کاری، اور خطے میں امن کے فروغ پر مشتمل ہوگا۔

ایرانی حکام کے مطابق تہران کی پالیسی ہمیشہ یہ رہی ہے کہ خطے کے ممالک کے درمیان بھائی چارے، تعاون اور خودمختاری کے اصولوں کو مضبوط کیا جائے۔ لاریجانی نے کہا کہ ایران اور پاکستان دو ایسے ممالک ہیں جو خطے کے امن میں کلیدی حیثیت رکھتے ہیں اور دونوں کی مشترکہ کوششوں سے جنوبی و مغربی ایشیا میں استحکام اور ترقی کی نئی راہیں کھولی جا سکتی ہیں۔

دیکھیں: اقوام متحدہ کی سلامتی کونسل نے غزہ امن منصوبے کو منظوری دے دی، پاکستان کی حمایت