کالعدم تنظیم القاعدہ برصغیر نے ایک نئی چھ منٹ کی پروپیگنڈا ویڈیو جاری کی ہے جس میں افغانستان میں طالبان کی دوبارہ حکومت قائم ہونے کا سہرا القاعدہ کے سر باندھنے کی کوشش کی گئی ہے۔ اس ویڈیو کا عنوان “صحرائے لیلیٰ سے فتحِ کابل تک” رکھا گیا ہے اور اس میں اردو، پشتو، عربی اور انگریزی زبانوں میں سب ٹائٹلز شامل ہیں۔
ویڈیو میں پس منظر کے طور پر جہادی نشید چلائی گئی ہے اور دعویٰ کیا گیا ہے کہ 2001 میں طالبان حکومت کے خاتمے کے بعد گزشتہ بیس سال کے دوران مزاحمت کو برقرار رکھنے اور آخری کار طالبان کی واپسی میں القاعدہ اور اس کے اتحادی نیٹ ورکس نے مرکزی کردار ادا کیا۔ پروپیگنڈا میں یہ بھی کہا گیا ہے کہ اقتدار کے استحکام کے مراحل میں عرب جنگجوؤں، پاکستانی شدت پسندوں اور وسطی ایشیائی ممالک سے تعلق رکھنے والے گروہوں نے کابل کی فتح میں ساتھ نبھایا۔
حکام اور ماہرین کے مطابق یہ ویڈیو بین الاقوامی سطح پر ایک بار پھر طالبان اور عالمی جہادی نیٹ ورکس کے گہرے روابط پر سوالات اُٹھا سکتی ہے، خصوصاً ایسے وقت میں جب عالمی برادری طالبان سے دہشت گرد گروہوں سے لاتعلقی کے عملی ثبوت کا تقاضا کر رہی ہے۔ تجزیہ کاروں کا کہنا ہے کہ اس طرح کی پروپیگنڈا عالمی سلامتی کے خدشات میں اضافے کا سبب بن سکتی ہے اور افغانستان کے مستقبل پر مزید غیر یقینی کے سائے گہرے ہو سکتے ہیں۔
دیکھیں: امریکی سینٹ میں طالبان کیلئے امداد کا سلسلہ روکنے کے بل کی منظوری تعطل کا شکار
