پشاور میں فیڈرل کانسٹیبلری ہیڈ کوارٹر پر دہشتگردوں کا حملہ ناکام بنا دیا گیا،۔ دہشت گردوں کے حملے کو ناکام بناتے ہوئے تین دہشت گرد ہلاک ہوئے جبکہ دوسری جانب ایف سی کے تین جوان شہید ہو ئے۔
پولیس ترجمان کے مطابق حملہ آوروں نے سنہری مسجد کے قریب واقع ایف سی ہیڈ کوارٹر کو نشانہ بنانے کی کوشش کی۔ واقعے کے بعد شہر بھر میں سیکیورٹی سخت کرتے ہوئے سنہری مسجد روڈ کو آمد و رفت کے لیے بند کر دیا گیا اور متبادل راستے استعمال کرائے گئے۔
تفصیلات کے مطابق دہشت گردوں کے ایک گروہ نے مرکزی گیٹ پر حملہ کیا۔ ایک حملہ آور نے تو مرکزی گیٹ کے قریب ہی خود کو دھماکے سے اڑا لیا جبکہ اس کے دو ساتھی عمارت کے اندر داخل ہونے میں کامیاب ہو ئے۔ سیکیورٹی فورسز نے بروقت جوابی کارروائی کرتے ہوئے دونوں دہشت گردوں کو جھڑپ کے دوران ہلاک کر دیا۔
سی سی پی او پشاور ڈاکٹر میاں سعید نے اپنے بیان میں کہا کہ فیڈرل کانسٹیبلری کے جوانوں نے اپنی صلاحیت کا مظاہرہ کرتے ہوئے ملک کو بڑے سانحے سے محفوظ رکھا۔ سی سی سی پی او نے شہید ہونے والے جوانوں کے لواحقین سے تعزیت کا بھی اظہار کرتے ہوئے کہا کہ علاقے کو مکمل طور پر سیل کر دیا گیا ہے اور سیکیورٹی فورسز نے تحقیقات کا آغاز کر دیا ہے۔
شہید ہونے والے جوانوں میں حوالدار عالمزیب خان، سپاہی ریاست خان اور سپاہی الطاف خان شامل ہیں۔
دوسری جانب وزیراعلیٰ خیبرپختونخوا نے فرنٹیئر کانسٹیبلری ہیڈکوارٹرز پر دہشتگردوں کے حملے کی شدید مذمت کرتے ہوئے آئی جی پولیس سے واقعے کی فوری رپورٹ طلب کرلی ہے۔ انہوں نے زخمی اہلکاروں کو بہترین اور فوری طبی سہولیات فراہم کرنے کی ہدایت جاری کی۔ وزیراعلیٰ کا کہنا تھا کہ جوانوں نے بہادری اور بروقت کارروائی سے بڑی تباہی کو ٹال دیا، یہ حملہ نہایت افسوسناک اور قابلِ مذمت ہے۔ دہشتگرد کسی مذہب کے نمائندہ نہیں، ایسے بزدلانہ واقعات ہمارے حوصلے کمزور نہیں کرسکتے۔
وزیراعلیٰ نے واضح کیا کہ شہدا قوم کا فخر ہیں اور ان کا خون رائگاں نہیں جانے دیا جائے گا۔ انہوں نے ہدایت دی کہ حملے میں ملوث عناصر کو قانون کے کٹہرے میں لایا جائے اور دہشتگردی کے خلاف جنگ مزید مضبوط عزم کے ساتھ جاری رکھی جائے۔ وزیراعلیٰ نے کہا کہ قیامِ امن کے لیے تمام وسائل بروئے کار لائے جائیں گے اور صوبائی حکومت پولیس اور قانون نافذ کرنے والے اداروں کے ساتھ مکمل یکجہتی سے کھڑی ہے۔ انہوں نے شہدا کے لیے دعائے مغفرت اور لواحقین کے لیے صبرِ جمیل کی دعا بھی کی۔
دیکھیں: سی ٹی ڈی کی پشاور میں کامیاب کارروائی، خودکش بمبار گرفتار