بلوچستان میں سکیورٹی فورسز نے دہشتگردوں کے خلاف دو مختلف کارروائیاں کی ہیں۔ مستونگ میں فورسز نے کمانڈر نقیب سمیت 3 دہشتگردوں کو ہلاک کیا۔ ادھر پشین میں سی ٹی ڈی کی کارروائی کے دوران 6 مبینہ دہشتگرد مارے گئے۔
سکیورٹی فورسز نے مستونگ میں فتنۃ الہندوستان کے خلاف کارروائی کی۔ فورسز نے دہشتگردوں کی گاڑی کو کواڈ کاپٹر کے ذریعے نشانہ بنایا۔
اس حملے میں دہشتگردوں کی گاڑی مکمل تباہ ہو گئی۔ کارروائی کے دوران کمانڈر نقیب سمیت 3 دہشتگرد موقع پر مارے گئے۔
سکیورٹی ذرائع کا کہنا ہے کہ فورسز دہشتگردی کے خاتمے کے لیے پُرعزم ہیں۔ ملک سے آخری دہشتگرد کے خاتمے تک یہ کارروائیاں جاری رہیں گی۔
پشین میں سی ٹی ڈی کا آپریشن
دوسری جانب پشین کے علاقے سرانان میں فورسز نے مشترکہ کارروائی کی۔ اس انٹیلی جنس بیسڈ آپریشن میں پولیس، اے ٹی ایف اور سی ٹی ڈی نے حصہ لیا۔
یہ کارروائی سرانان، کلی اجرم، کلی سلطان اور کلی مسافر میں کی گئی۔ فورسز نے قلعہ عبداللہ اور کوئٹہ کے قریبی علاقوں کا گھیراؤ کیا۔
فائرنگ کے تبادلے میں 6 مبینہ دہشتگرد ہلاک ہو گئے۔ فورسز نے کارروائی کے دوران 5 مشتبہ افراد کو حراست میں لے لیا۔
سی ٹی ڈی ترجمان کے مطابق فائرنگ سے 4 اہلکار زخمی ہوئے۔ ہلاک افراد کا تعلق کالعدم تنظیم سے تھا، جو سنگین وارداتوں میں ملوث تھے۔
فورسز نے جائے وقوع سے بھاری اسلحہ اور بارود بھی برآمد کر لیا۔ بعد ازاں ہلاک افراد کی لاشیں کوئٹہ کے ہسپتال منتقل کر دی گئیں۔
دیکھیے: خیبر میں سکیورٹی فورسز کی کارروائی، حیات آباد ٹول پلازہ حملے میں ملوث 4 خوارج ہلاک
