چینی وزارت خارجہ نے پاک افغان جنگ بندی معاہدے کو سراہتے ہوئے اسے خطے کے لیے ایک مثبت قدم قرار دیا ہے۔ چینی حکومت نے دونوں ممالک کے مابین پائیدار قیامِ امن کے لیے اپنا کردار ادا کرنے کا عزم بھی دہرایا ہے۔
چینی وزارتِ خارجہ کے ترجمان گو جیائون نے اپنے بیان میں کہا کہ پاکستان اور افغانستان دونوں چین کے قریبی دوست اور ہمسایہ ہیں۔ ہم دونوں فریقین کے درمیان جنگ بندی پر معاہدے کا خیرمقدم کرتے ہیں اور ان ممالک کی کوششوں کو سراہتے ہیں جنہوں نے اس سلسلے میں کردار ادا کیا۔
انکا کہنا تھا کہ دونوں ممالک مذاکرات کے ذریعے مسائل کا حل نکالیں گے اور اس عارضی جنگ بندی کو مستقل امن میں تبدیل کریں گے۔
انہوں نے مزید کہا کہ چین خطے میں استحکام اور باہمی تعاون کا حامی ہے اور وہ پاکستان اور افغانستان کے درمیان سفارتی اور تعمیری رابطے جاری رکھے گا۔
چین کا خطے میں کردار
چین پہلے ہی سی پیک اور دیگر ترقیاتی منصوبوں کے ذریعے علاقائی تجارت میں دلچسپی رکھتا ہے۔ تجزیہ کاروں کے مطابق اگر پاکستان اور افغانستان کے تعلقات بہتر ہوتے ہیں تو اس سے خطے میں چین کے بڑے منصوبوں جیسے کہ تاپی گیس پائپ لائن اور ٹرانس افغان ریلوے کو مزید مواقع مل سکتے ہیں۔
دیکھیں: پاکستان اور افغانستان نے سرحد پار دہشت گردی کے خاتمے پر اتفاق کر لیا؛ خواجہ آصف
