سعودی عرب کے تین شہروں خمیس مشیط، ابہا اور طائف پر حوثیوں کے میزائل اور ڈرون حملوں میں 13 افراد زخمی ہوگئے۔ حملوں میں 7 رہائشی مکانات اور 2 گاڑیوں کو بھی نقصان پہنچا۔
سعودی اتحاد کے ترجمان میجر جنرل ترکی المالکی نے بتایا کہ حوثیوں نے شہری آبادیوں کو بیلسٹک میزائلوں اور ڈرونز سے نشانہ بنایا۔
ترکی المالکی کے مطابق حملوں میں زخمی ہونے والے افراد کو معمولی سے درمیانے درجے کے زخم آئے ہیں۔ تاہم حملوں سے کئی رہائشی مکانات اور گاڑیاں متاثر ہوئی ہیں۔
انہوں نے کہا کہ شہری علاقوں اور بنیادی ڈھانچے کو نشانہ بنانا حوثیوں کی مسلسل کارروائیوں کا حصہ ہے۔
سعودی اتحاد کا جواب دینے کا اعلان
سعودی اتحاد کے ترجمان نے کہا کہ اتحاد ملک کی خودمختاری، شہریوں اور شہری تنصیبات کے تحفظ کے لیے مؤثر جواب دے گا۔
ان کے مطابق سعودی عرب کا ممکنہ ردعمل اقوام متحدہ کے چارٹر کے آرٹیکل 51 کے تحت اپنے دفاع کے حق اور بین الاقوامی انسانی قانون کے مطابق ہوگا۔
ترکی المالکی نے مزید کہا کہ سعودی اتحاد مزید حملوں کی روک تھام کے لیے تمام ضروری فوجی اقدامات کرے گا۔
یہ حملے ایسے وقت میں ہوئے ہیں جب یمن اور سعودی عرب کے درمیان کشیدگی میں ایک بار پھر اضافہ ہو رہا ہے۔ خطے میں جاری وسیع تر جنگ کے باعث بحیرہ احمر اور خلیجی علاقے کی سکیورٹی صورتحال بھی حساس ہے۔
دیکھیے: حوثی باغیوں کا بڑا حملہ: بحیرہ احمر کے دو اہم جزیروں پر کنٹرول حاصل کر لیا
