پاسداران انقلاب نے کہا ہے کہ امریکہ اپنی فوجی شکست کا ازالہ کرنے کے لیے ایران پر مسلسل حملے کر رہا ہے، تاہم ایرانی مسلح افواج بھرپور جواب دے رہی ہیں اور آبنائے ہرمز کا کنٹرول مکمل طور پر ایران کے ہاتھ میں ہے۔
پاسداران انقلاب کے کے نائب کمانڈر بریگیڈیئر جنرل یداللہ جوانی نے اپنے بیان میں کہا کہ اردن، کویت، عمان اور دیگر ممالک میں قائم امریکی فوجی اڈوں پر حملوں سے بھاری نقصان پہنچایا گیا ہے، اور شدید حملوں کا یہ سلسلہ آئندہ بھی جاری رہے گا۔
انہوں نے مزید کہا کہ امریکہ حملوں اور آبنائے ہرمز میں جنگ سے پہلے کی صورتحال بحال کرنے کی کوششوں کے ذریعے اپنی شکست کا ازالہ کرنا چاہتا ہے، لیکن وہ اس میں ہرگز کامیاب نہیں ہوگا کیونکہ خطے میں ایک بڑی جیوپولیٹیکل تبدیلی رونما ہو چکی ہے۔
ایرانی کمانڈر نے زور دے کر کہا کہ سپریم لیڈر کی شہادت میں ملوث افراد کو سزا دی جائے گی اور ان سے بدلہ لیا جائے گا، اور متعلقہ افراد کو سکون اور آرام بھول جانا چاہیے۔
آبنائے ہرمز کے حوالے سے جوانی کا کہنا تھا کہ اس اہم اسٹریٹجک بحری گزرگاہ پر ایران کے کنٹرول نے خطے میں طاقت کے توازن کو بنیادی طور پر تبدیل کر دیا ہے۔
ان کے مطابق امریکہ آبنائے ہرمز میں ایران کے نافذ کردہ نئے قوانین کو چیلنج کرنے کی کوشش کر رہا ہے، جس کے لیے فوجی جارحیت اور بحری ناکہ بندی کا سہارا لیا جا رہا ہے، تاہم یہ آبی گزرگاہ ایران کا حصہ ہے اور اس پر مکمل کنٹرول برقرار ہے۔
پاسداران انقلاب کے کمانڈر نے بتایا کہ فوجی یا شہری اہداف پر کیے گئے تمام امریکی حملوں کا فیصلہ کن جواب دیا گیا ہے۔ ان کا کہنا تھا کہ چاہے امریکہ نے فوجی تنصیبات کو نشانہ بنایا ہو یا شہری مراکز کو، یا فوجی اہلکاروں اور عام شہریوں کو نشانہ بنایا ہو، ہر حملے کا بھرپور اور سخت جواب دیا گیا ہے۔
کمانڈر یداللہ جوانی نے واضح کیا کہ خواہ 12 روزہ جنگ ہو، 40 روزہ کشیدگی ہو یا حالیہ دنوں کی صورتحال، ایرانی مسلح افواج ہر محاذ پر مؤثر جواب دینے کی صلاحیت رکھتی ہیں۔
دیکھیے: امریکہ کے ایران پر مسلسل نویں رات بھی حملے، خطے میں کشیدگی میں اضافہ
