راولپنڈی: سکیورٹی فورسز نے بلوچستان کے مختلف اضلاع میں دہشت گردوں کے خلاف انٹیلی جنس بیسڈ آپریشنز کرتے ہوئے متعدد عسکریت پسندوں کو ہلاک کر دیا ہے۔ آئی ایس پی آر کے مطابق یہ کارروائیاں مستونگ، نوشکی، ژوب، کیچ اور خضدار کے علاقوں میں کی گئیں۔
آئی ایس پی آر کے مطابق سکیورٹی فورسز نے دہشت گردوں کی موجودگی کی خفیہ اطلاعات پر ان اضلاع میں انتہائی مؤثر کارروائیاں کیں اور ان کے خفیہ ٹھکانوں کو کامیابی سے نشانہ بنایا۔ آپریشنز کے دوران شدید فائرنگ کے تبادلے میں متعدد دہشت گرد مارے گئے، جن کا تعلق دہشت گرد تنظیم فتنہ الہندوستان سے بتایا گیا ہے۔ ہلاک ہونے والے یہ دہشت گرد ملک میں تخریب کاری، سیکیورٹی فورسز پر حملوں اور متعدد دہشت گردانہ کارروائیوں میں ملوث تھے۔
دھماکہ خیز مواد
کامیاب آپریشن کے بعد سکیورٹی فورسز نے مسمار کیے گئے ٹھکانوں سے بھاری مقدار میں جدید اسلحہ، گولہ بارود اور دھماکہ خیز مواد برآمد کیا ہے۔ ترجمان کے مطابق برآمد ہونے والے مواد میں پہلے سے تیار شدہ آئی ای ڈیز بھی شامل ہیں، جنہیں فورسز نے قبضے میں لے کر ناکارہ بنا دیا۔ فورسز نے تمام علاقوں کا کنٹرول سنبھال لیا ہے اور کسی بھی دوسرے ممکنہ دہشت گرد کی موجودگی کے خاتمے کے لیے کلیئرنس آپریشنز اب بھی جاری ہیں۔
دہشت گردی کے خاتمے کا عزم
آئی ایس پی آر کا کہنا ہے کہ عزمِ استحکام کے تحت ملک بھر میں دہشت گردی کے خلاف مہم پوری قوت اور عزم کے ساتھ جاری رہے گی۔ سکیورٹی حکام نے واضح کیا ہے کہ پاکستان کی خودمختاری اور امن کو نشانہ بنانے والی غیر ملکی سرپرستی میں چلنے والی ہر قسم کی دہشت گردی کا ملک سے مکمل طور پر خاتمہ کیا جائے گا اور اس مقصد کے حصول تک سیکیورٹی فورسز اپنی کارروائیاں جاری رکھیں گی۔
دیکھیے: افغانستان کے اسلحہ ذخائر پر پاکستان کا عالمی سطح پر اظہارِ تشویش، فوری اقدامات کا مطالبہ
