Skip to content 
افغانستان کی جانب سے بلا اشتعال حملوں کے بعد ملک بھر میں عوام نے پاک فوج اور سیکیورٹی فورسز کے ساتھ بھرپور اظہارِ یکجہتی کیا ہے۔ شہریوں کا کہنا ہے کہ کسی بھی بیرونی جارحیت کی صورت میں قوم اپنی افواج کے شانہ بشانہ کھڑی ہے اور ملک کے دفاع کے لیے ہر قربانی دینے کو تیار ہے۔
بلوچستان کے مختلف شہروں میں عوامی ریلیوں، مظاہروں اور دعائیہ اجتماعات کا انعقاد کیا گیا، جن میں شہریوں نے پاک فوج کے حق میں نعرے لگائے اور افغان طالبان کے حملوں کی شدید مذمت کی۔ عوام کا کہنا تھا کہ پاک فوج نے جس عزم اور بہادری سے افغان طالبان کو مؤثر جواب دیا، اس پر پوری قوم کو فخر ہے۔ ایک شہری نے کہا، “ہم نے افغانیوں کی چالیس سال خدمت کی، مگر افسوس کہ انہوں نے مودی کی گود میں بیٹھ کر ہم پر حملہ کیا۔”
عوام نے کہا کہ افغان طالبان کی جارحیت کے پیچھے بھارت کا ہاتھ ہے، جو اپنی ناکامی کے بعد افغانستان کو پاکستان کے خلاف پراکسی کے طور پر استعمال کر رہا ہے۔ شہریوں نے کہا کہ افغان طالبان نے شہری آبادیوں کو نشانہ بنایا، جبکہ پاکستان کی کارروائیاں صرف دہشت گرد ٹھکانوں تک محدود رہیں، جو عالمی قوانین کے عین مطابق ہیں۔
شرکاء نے کہا کہ افغانستان کو پاکستان کے احسانات یاد رکھنے چاہییں، کیونکہ پاکستان نے چار دہائیوں تک لاکھوں افغان مہاجرین کی میزبانی کی۔ ایک شہری نے کہا، “افغان طالبان کو پہلے سوچنا چاہیے تھا کہ وہ کس ملک پر حملہ کر رہے ہیں — اسی ملک پر جس نے ان کے لیے اپنے دروازے کھولے تھے۔”
عوام نے دعا کی کہ اللہ تعالیٰ پاک فوج کو مزید طاقت اور ہمت دے تاکہ وہ دشمنوں کے ناپاک عزائم ناکام بناتی رہے۔ شہریوں نے عزم ظاہر کیا کہ “جو بھی پاکستان کی طرف میلی آنکھ سے دیکھے گا، ہم اس کی آنکھ نکال دیں گے۔”
عوامی جذبات اس امر کا ثبوت ہیں کہ پوری قوم اپنی افواج کے ساتھ متحد ہے اور کسی بھی بیرونی جارحیت کا منہ توڑ جواب دینے کے لیے تیار ہے۔
دیکھیں: پاکستان اور افغانستان کے درمیان آئندہ 48 گھنٹوں کیلئے جنگ بندی پر اتفاق ہو گیا
