نائب وزیرِ اعظم و وزیرِ خارجہ اسحاق ڈار مکہ دفاعی معاہدے کے تحت قائم اسٹریٹجک سیاسی و دفاعی کمیٹی کے اجلاس میں شرکت کے لیے سعودی عرب پہنچ گئے۔
ریاض میں ہونے والا اہم اجلاس آج منعقد ہوگا۔ اجلاس میں خطے کی تازہ صورتحال اور مکہ دفاعی معاہدے کے تحت جاری تعاون پر تبادلہ خیال کیا جائے گا۔
دفترِ خارجہ کے مطابق اجلاس میں مکہ دفاعی معاہدے کو مزید مؤثر اور ادارہ جاتی شکل دینے کے لیے پیش رفت کا جائزہ لیا جائے گا۔
اجلاس میں پاکستان، سعودی عرب اور ترکیہ کے اعلیٰ حکام شریک ہوں گے۔ پاکستان کی جانب سے فیلڈ مارشل عاصم منیر، نائب وزیرِ اعظم اسحاق ڈار اور وزیرِ دفاع خواجہ آصف شرکت کریں گے۔
سعودی عرب اور ترکیہ کے وزرائے خارجہ، وزرائے دفاع اور چیف آف جنرل اسٹاف بھی اجلاس میں شریک ہوں گے۔ اجلاس میں خطے کی موجودہ سکیورٹی صورتحال پر بھی تبادلہ خیال متوقع ہے۔
گزشتہ ہفتے اسحاق ڈار نے بتایا تھا کہ ایران نے حوثیوں کے ساتھ سیاسی مذاکرات کی تجویز دی ہے۔ ان کے مطابق مکہ دفاعی معاہدے کی اسٹریٹجک سیاسی و دفاعی کمیٹی کے اجلاس میں اس معاملے پر بھی غور کیا جائے گا۔
سعودی عرب پہنچنے کے بعد اسحاق ڈار نے مدینہ منورہ میں روضۂ رسول ﷺ پر حاضری دی۔ دفترِ خارجہ کے مطابق وزیرِ خارجہ نے پاکستان اور امت مسلمہ کی سلامتی و خوش حالی کے لیے دعا بھی کی۔
دیکھیے: پی ٹی آئی مارچ میں سرکاری مشینری کا استعمال، مسلح افراد کی موجودگی کا انکشاف