نیپال میں تباہ کن سیلاب کے بعد متاثرہ علاقوں میں امدادی کارروائیاں جاری ہیں۔ چھ روز کے دوران ہلاکتوں کی تعداد 903 ہوگئی۔
اطلاعات کے مطابق سیلاب کے بعد 2500 سے زائد افراد تاحال لاپتہ ہیں۔ لاپتہ افراد میں 275 بھارتی، 43 آسٹریلوی، امریکی، یوکرینی اور دیگر ممالک کے شہری بھی شامل ہیں۔
نیپال وزارتِ تعلیم کے مطابق سب سے زیادہ متاثرہ تین اضلاع میں کم از کم 19 سکول متاثر ہوئے۔ ان اضلاع میں 200 سے زائد طلبہ لاپتہ ہیں۔
دوسری جانب حکام نے مزید سیلاب آنے کے خدشے کے پیش نظر نیا الرٹ جاری کیا ہے۔ متاثرہ اضلاع کے رہائشیوں کو انتہائی چوکس رہنے کی ہدایت کی گئی ہے۔
اطلاعات کے مطابق یہ وارننگ نیپال اور تبت کی سرحد پر واقع بھوٹے کوشی دریا میں پانی کی سطح بلند ہونے کے بعد جاری کی گئی۔ چینی حکام کی جانب سے بالائی علاقوں میں پانی کے بہاؤ میں اضافے سے آگاہ کیے جانے کے بعد یہ الرٹ جاری ہوا۔
نیز تبت میں 16 افراد ہلاک جبکہ 246 افراد لاپتہ ہیں۔ لاپتہ افراد میں سو کا تعلق نیپال سے ہے جبکہ باقی کا تعلق ایک درجن سے زائد دیگر ممالک سے ہے۔
دیکھیے: نیپال، تبت میں تباہ کن سیلاب، 273 سے زائد افراد ہلاک، 1500 لاپتہ
