مظفرآباد: وزیراعظم آزاد حکومت ریاست جموں و کشمیر فیصل ممتاز راٹھور نے کہا ہے کہ ریاستی اداروں اور نظام پر عوامی اعتماد کی بحالی اور مایوسی کا خاتمہ ان کی حکومت کی سب سے بڑی کامیابی ہے۔
مظفرآباد میں ٹی وی جرنلسٹس ایسوسی ایشن کے وفد سے گفتگو کرتے ہوئے وزیراعظم نے کہا کہ اگر حکومت عوام کے درمیان رہ کر ان کے مسائل حل نہ کرتی تو نظام کو سنگین خطرات لاحق ہو سکتے تھے، تاہم قلیل وقت اور دباؤ کے باوجود عوام میں امید پیدا کرنا ایک اہم پیشرفت ہے۔
انہوں نے کہا کہ آزاد کشمیر میں سیاسی سرگرمیاں بحال ہو چکی ہیں اور عوام کا جمہوری عمل پر اعتماد دوبارہ قائم ہوا ہے، جبکہ پیپلز پارٹی کی حکومت مشکل حالات میں امید کی کرن بن کر ابھری ہے۔
وزیراعظم نے سوشل اور ڈیجیٹل میڈیا کی اہمیت پر زور دیتے ہوئے کہا کہ یہ ایک مؤثر ہتھیار ہے جس کے دانشمندانہ استعمال سے امن کو فروغ دیا جا سکتا ہے، تاہم فیک نیوز اور منفی پروپیگنڈا ریاست کے استحکام کے لیے خطرہ ہیں، جن کا سدباب اولین ترجیح ہے۔
انہوں نے کہا کہ ذمہ دارانہ صحافت کے فروغ اور فیک نیوز کی روک تھام میں میڈیا کا کردار انتہائی اہم ہے، اور حکومت اس سلسلے میں صحافیوں کو ہر ممکن سہولت فراہم کرے گی۔
فیصل ممتاز راٹھور نے کہا کہ ریاست کی پائیدار ترقی کے لیے حکومتوں کا تسلسل ضروری ہے، اور کم از کم پانچ سے دس سال کی پالیسی تسلسل سے ہی خود انحصاری کے اہداف حاصل کیے جا سکتے ہیں۔
انہوں نے بتایا کہ کئی برسوں سے تعطل کا شکار ترقیاتی منصوبوں پر کام شروع کر دیا گیا ہے، جن میں مظفرآباد سالڈ ویسٹ مینجمنٹ منصوبہ بھی شامل ہے، جو ایک اہم پیشرفت ہے۔
اس موقع پر وزیر اطلاعات چوہدری محمد رفیق نیئر، معاون خصوصی سید عزادار حسین کاظمی، ترجمان شوکت جاوید میر اور دیگر حکام بھی موجود تھے۔
ٹی وی جرنلسٹس ایسوسی ایشن کے صدر آصف رضا میر نے وزیراعظم کو فیک نیوز کے سدباب اور ذمہ دارانہ رپورٹنگ کے حوالے سے بریفنگ دی، جس پر وزیراعظم نے تنظیم کی کارکردگی کو سراہا اور امید ظاہر کی کہ میڈیا آئندہ بھی جمہوریت اور سیاسی رواداری کے فروغ میں اپنا کردار ادا کرتا رہے گا۔
دیکھئیے:جموں و کشمیر میں جنگل راج کی اجازت نہیں دیں گے، عمر عبداللہ کا رامبن واقعہ پر سخت کارروائی کا مطالبہ
