پشاور ہائی کورٹ کے باہر سے گرفتار کیے گئے پاکستان تحریک انصاف کے رہنما تیمور سلیم جھگڑا، کامران بنگش اور عرفان سلیم کو جیل منتقل کر دیا گیا ہے۔
پولیس نے تینوں رہنماؤں کو گزشتہ رات پشاور ہائی کورٹ کے مرکزی گیٹ سے حراست میں لیا تھا۔ پولیس کے مطابق انہیں تھری ایم پی او کے تحت گرفتار کیا گیا ہے۔
گرفتاری سے قبل ایس ایس پی آپریشنز فرحان خان پولیس نفری کے ہمراہ ہائی کورٹ پہنچے اور بار روم میں پی ٹی آئی رہنماؤں سے ملاقات کی۔ انہوں نے تینوں رہنماؤں کو گرفتاری دینے پر آمادہ کرنے کی کوشش کی، جس کے بعد پولیس نے انہیں مرکزی گیٹ سے حراست میں لے لیا۔
گرفتاری کے وقت ایک صحافی نے ایس ایس پی آپریشنز سے سوال کیا کہ کیا ان کے پاس تھری ایم پی او کے تحت گرفتاری کے احکامات موجود ہیں؟ اس پر فرحان خان نے تصدیق کی کہ ان کے پاس متعلقہ احکامات موجود ہیں۔
دوسری جانب انسداد دہشت گردی عدالت نے ریڈیو پاکستان حملہ کیس میں تینوں رہنماؤں کی درخواست ضمانت خارج کر دی تھی۔ اس کے بعد پولیس نے انہیں گرفتار کرنے کی کوشش کی، تاہم انصاف لائرز فورم کے وکلا نے اس وقت پولیس کو گرفتاری سے روک دیا تھا۔
بعد ازاں تینوں رہنما عبوری ضمانت کے لیے پشاور ہائی کورٹ پہنچے، جہاں ان کی درخواست ضمانت منظور کر لی گئی۔ تاہم ہائی کورٹ کے مرکزی گیٹ پر موجود پولیس نفری نے انہیں حراست میں لے لیا۔





