افغان حکام نے تاپی گیس پائپ لائن منصوبے میں پیشرفت کی تصدیق کی ہے۔ ان کے مطابق افغانستان کے اندر 91 کلومیٹر طویل پائپ لائن کی تعمیر مکمل کر لی گئی ہے۔ تفصیلات کے مطابق ہرات کے گورنر مولانا نور محمد اسلام جار نے افغانستان میں تاپی منصوبے کے سربراہ باگنج عبداللایف اور ہرات میں تعینات ترکمانستان کے قونصل جنرل سے ملاقات کی۔
اس ملاقات میں منصوبے کی پیشرفت پر اطمینان کا اظہار کیا گیا۔ گورنر ہرات نے افغانستان اور ترکمانستان کی مشترکہ کوششوں کو سراہا، اور باہمی تعاون کے تسلسل سے منصوبے کی تکمیل کی امید ظاہر کی۔
ترکمانستان کے قونصل جنرل نے تاپی منصوبے کے لیے سہولیات فراہم کرنے پر امارتِ اسلامیہ افغانستان کا شکریہ ادا کیا، اور یقین دلایا کہ طے شدہ منصوبے کے مطابق رواں سال کے اختتام تک ہرات میں منصوبے سے متعلق کام مکمل کر لیا جائے گا۔ منصوبے کے سربراہ باگنج عبداللایف نے تصدیق کی کہ تعمیراتی سرگرمیوں کو مؤثر انداز میں آگے بڑھانے کے لیے منصوبے کے روٹ کے ساتھ متعدد ورک کیمپس قائم کیے گئے ہیں۔
واضح رہے کہ چار ممالک پر محیط یہ منصوبہ ترکمانستان سے شروع ہو کر افغانستان اور پاکستان سے گزرتا ہوا بھارت تک جاتا ہے، جس کی مجموعی لمبائی تقریباً 1,800 کلومیٹر ہے۔ اس میں سے 816 کلومیٹر کا حصہ افغانستان کے مغربی صوبے ہرات سے گزرتا ہے، جہاں تعمیراتی سرگرمیاں جاری ہیں۔
دیکھیں: خیبرپختونخوا بدامنی کی لپیٹ میں، دہشتگرد بے لگام؛ وزیراعلیٰ کے صوبے سے باہر دورے
