خیبر پختونخوا کے ضلع اورکزئی کے علاقے سنگرا میں پولیس نے فائرنگ کے تبادلے کے بعد کالعدم تحریک طالبان پاکستان (ٹی ٹی پی) کے ایک مبینہ شدت پسند کو اس کے سہولت کار سمیت گرفتار کر لیا ہے۔
ذرائع کے مطابق ضلع خیبر کے علاقے تیراہ (اکاخیل شڈلے) سے تعلق رکھنے والے کالعدم ٹی ٹی پی کے 5 سے 6 مبینہ شدت پسند موٹر سائیکلوں پر سوار ہو کر ضلع اورکزئی کے علاقے سنگرا میں داخل ہونے کی کوشش کر رہے تھے۔ مقامی شہریوں نے مشکوک نقل و حرکت دیکھتے ہی فوری طور پر پولیس کو اطلاع فراہم کی۔
اطلاع ملتے ہی پولیس نفری موقع پر پہنچی، جہاں فورسز اور مشتبہ مسلح افراد کے درمیان فائرنگ کا شدید تبادلہ ہوا۔ بعد ازاں پولیس نے گھیراؤ کرتے ہوئے سنگرا بازار کی ایک دکان سے ایک مبینہ شدت پسند اور اس کے مقامی سہولت کار کو حراست میں لے لیا۔
سکیورٹی ذرائع کا کہنا ہے کہ گرفتار کیے گئے دونوں ملزمان کو مزید تفتیش کے لیے نامعلوم مقام پر منتقل کر دیا گیا ہے جبکہ فرار ہونے والے دیگر شرپسندوں کی تلاش کے لیے علاقے میں سرچ آپریشن شروع کر دیا گیا ہے۔
دیکھیے: طالبان گورنر سے ملاقات کے بعد 70 عمائدین لاپتا، صوبہ غور میں امن و امان کی صورتحال سنگین
