پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خیبرپختونخوا کے مختلف علاقوں میں دو علیحدہ کارروائیوں کے دوران بھارت کی سرپرستی میں سرگرم دہشت گرد تنظیم ’’ٹی ٹی پی فتنہ الخوارج‘‘ کے 20 دہشت گردوں کو ہلاک کر دیا۔
ترجمان کے مطابق، 8 اور 9 نومبر کو خفیہ اطلاعات کی بنیاد پر شمالی وزیرستان کے علاقے شوال میں کارروائی کی گئی، جہاں سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا۔ فائرنگ کے تبادلے میں بھارت کے حمایت یافتہ 8 خوارج ہلاک ہوگئے۔
اسی طرح ایک اور انٹیلی جنس بیسڈ آپریشن دہرا آدم خیل میں کیا گیا، جہاں شدید مقابلے کے بعد 12 مزید دہشت گرد مارے گئے۔
آئی ایس پی آر کا کہنا ہے کہ علاقے میں کلیئرنس اور سینیٹائزیشن آپریشن جاری ہے تاکہ کسی بھی چھپے ہوئے دہشت گرد کو ختم کیا جا سکے۔
بیان میں مزید کہا گیا کہ سیکیورٹی فورسز اور قانون نافذ کرنے والے ادارے ’’عزمِ استحکام‘‘ کے تحت دہشت گردی کے مکمل خاتمے کے لیے اپنی کارروائیاں پوری قوت سے جاری رکھیں گے۔ پاکستان سے غیر ملکی سرپرستی میں چلنے والی دہشت گردی کو جڑ سے اکھاڑنے تک یہ مہم جاری رہے گی۔