بلوچستان کے ضلع زیارت میں سیکیورٹی فورسز نے ایک بڑی سازش کو ناکام بنا دیا۔ لیویز فورس اور ضلعی انتظامیہ کی مشترکہ کارروائی کے نتیجے میں پانچ دہشت گردوں کو گرفتار کرلیا گیا جو افغانستان کے صوبہ قندہار سے تعلق رکھتے ہیں۔
ترجمان کے مطابق مذکورہ کارروائی سپیرا رغہ چیک پوسٹ پر کی گئی جہاں ملزمان کے پاس سے بڑی مقدار میں اسلحہ اور بارودی مواد برآمد ہوا۔ تفصیلات کے مطابق دہشت گردوں سے برآمد کیے گئے اسلحے میں 11 ہینڈ گرینیڈ، 3 ایس ایم جیز، 2 ایم فور رائفلز، ایک گرینیڈ لانچر، 9 ایم فور میگزینز، 14 ایس ایم جی میگزینز، 420 ایس ایم جی راؤنڈز، 230 ایم فور راؤنڈز، ایک کلوگرام بارودی مواد، 6 وائرلیس سیٹس، 4 موبائل فونز، 2 آر پی جیز، ایک ڈگر، 13 ایمونیشن بیگز، 16 پاور سیلز، 15 ایس ایم جی گرینیڈز شامل ہیں اور اسکے ساتھ ساتھ ایک سوزوکی، ایک موٹر سائیکل اور کالعدم تنظیم ٹی ٹی پی کا لٹریچر بھی انکے پاس تھا۔
اس موقع پر وزیرِ اعلیٰ بلوچستان سرفراز بگٹی نے کامیاب آپریشن پر لیویز فورس اور ضلعی انتظامیہ کو مبارکباد دیتے ہوئے کہا کہ سیکیورٹی اداروں کی بروقت کارروائی نے صوبے کو ایک بڑے سانحے سے بچا لیا۔ انہوں نے مزید کہا کہ بلوچستان کے عوام کی حفاظت حکومت کی اولین ترجیح ہے اور دہشت گردوں کے خلاف کارروائیاں مزید تیز کی جائیں گی۔
وزیرِ اعلی بلوچستان کا کہنا تھا کہ ایسی کامیاب کاروائیاں دشمن کے عزائم کو خاک میں ملا دیتی ہیں۔ بلوچستان کی صوبائی حکومت نے عزم کیا ہے کہ قیامِ امن کے لیے ہر ممکن اقدام کیا جائے گا۔
ترجمان کے مطابق گرفتار شدہ ملزمان سے تفتیش جاری ہے اور مزید چھاپے مارے جا رہے ہیں۔
دیکھیں: ملک کے 20 پسماندہ اضلاع میں سے 17 بلوچستان کے اضلاع، رپورٹ میں انکشاف