خیبرپختوںخوا کے ضلع ڈیرہ اسماعیل خان میں پولیس ٹریننگ اسکول رتہ کلاچی پر فتنۃ الخوارج کا بڑا حملہ سیکیورٹی فورسز نے ناکام بنا دیا۔ پانچ گھنٹے طویل آپریشن چھ دہشت گرد مارے گئے جبکہ سات پولیس جوان شہید اور تیرہ زخمی ہوئے۔ حکام کے مطابق تمام زیرِ تربیت ریکروٹس اور عملے کو بحفاظت محفوظ مقام پر منتقل کر دیا گیا ہے۔
واقعہ گزشتہ شب اس وقت پیش آیا جب دہشت گردوں نے بارود سے بھرا ٹرک پولیس ٹریننگ اسکول کے مرکزی دروازے سے ٹکرا دیا، جس کے نتیجے میں زوردار دھماکہ ہوا۔ دھماکے کے فوراً بعد مختلف یونیفارم پہنے دہشت گرد اسکول کے اندر داخل ہوگئے اور اندھا دھند فائرنگ شروع کر دی۔
پولیس اہلکاروں نے بہادری سے مقابلہ کیا اور دہشت گردوں کو گھیرے میں لے لیا۔ فائرنگ کے تبادلے کے دوران خوارج مسلسل دستی بم پھینکتے رہے، تاہم پولیس نے جواں مردی کے ساتھ جوابی کارروائی جاری رکھی۔ ڈی پی او ڈیرہ اسماعیل خان صاحبزادہ سجاد احمد اور آر پی او سید اشفاق انور خود موقع پر موجود رہے اور آپریشن کی نگرانی کرتے رہے۔
پانچ گھنٹے طویل کارروائی کے بعد چھ دہشت گرد ہلاک کیے گئے۔ ہلاک دہشت گردوں کے قبضے سے خودکش جیکٹس، بارودی مواد، جدید اسلحہ اور ایمونیشن برآمد ہوا۔ زخمی ہونے والے تیرہ پولیس اہلکاروں کو فوری طور پر قریبی اسپتال منتقل کر دیا گیا۔
ڈی پی او ڈیرہ کے مطابق حملے کے وقت ٹریننگ اسکول میں تقریباً دو سو کے قریب ٹرینی، اساتذہ اور اسٹاف موجود تھا جنہیں بحفاظت محفوظ مقام پر منتقل کر دیا گیا۔
آئی جی پی خیبر پختونخوا ذوالفقار حمید نے بتایا کہ علاقے کو مکمل طور پر کلیئر قرار دے دیا گیا ہے اور اب سرچ اینڈ کلین آپریشن جاری ہے تاکہ کسی ممکنہ خطرے کا خاتمہ کیا جا سکے۔
آپریشن میں ایس ایس جی کمانڈوز، البرق فورس، ایلیٹ فورس اور پولیس کے جوانوں نے حصہ لیا۔
انہوں نے آر پی او اور ڈی پی او کی قیادت میں کامیاب کارروائی کو سراہتے ہوئے کہا کہ شہداء کی قربانی رائیگاں نہیں جائے گی۔ آئی جی پی نے شہداء کے درجات کی بلندی کے لیے دعا کی اور کامیاب آپریشن میں حصہ لینے والے تمام افسروں اور جوانوں کے لیے انعامات کا اعلان کیا۔
دیکھیں: ضلع اورکزئی میں سیکیورٹی فورسز کا کامیاب آپریشن، 19 خوارج ہلاک